რა ხანია, ვოცნებობდი მფრინავი თეფშები მენახა (ოღონდ, არა მეზობლის ფანჯრიდან), უცხოპლანეტელ არსებას შევხვედროდი და გამეგო, რა ხდება იქ, სამყაროს უსასრულო სივრცეში. და აი, როგორც იქნა, სურვილი მიხდება – მეცნიერების აღმოჩენით, ჩვენს დედამიწას რამდენიმე ხომალდი უახლოვდება, რომლებშიც უცხოპლანეტელები იმყოფებიან. ამ ინფორმაციას „ვიკილიქსიც" ადასტურებსო.

ერთი ამბავია ატეხილი თურმე, საზღვარგარეთ – არიქა, უცხოპლანეტელები დედამიწას გაანადგურებენო, საშინელი ომი დაიწყებაო... დედამიწას მისივე მკვიდრი ადამიანები ისედაც ვანადგურებთ, ომებიც არც ისე იშვიათობაა და, რაღა ჩვენთვის ჯერ უცნობ უცხოპლანეტელებს ვუყურებთ ასეთი შიშით?

მე სულაც არ მგონია, რომ უცხოპლანეტელები ადამიანებზე უფრო საშიშები იყვნენ. რატომ არ შეიძლება, რომ დედამიწის დათვალიერება აინტერესებდეთ? ჩვენი გაცნობა უნდოდეთ და სამეგობროდ მოდიოდნენ? კოსმოსშორისი ტურიზმის განვითარებაზე ფიქრიც შეიძლება – სულ ტურიზმზე არ გველაპარაკებიან ჩვენი წამყვანი ტელევიზიები? ჰოდა, იმ უცხოპლანეტელი ტურისტებიდან, ალბათ, უმრავლესობა ჩვენთან ჩამოვა – რამდენი რამე გაკეთდა ტურიზმისთვის, რამდენი ახალი სასტუმრო აშენდა, რამდენი გზა დაიგო, რამდენი ძეგლი დაიდგა... თუმცა, შეიძლება უცხოპლანეტელებს ჩვეულებრივი სასტუმრო არც გამოადგეთ... უნდა ვიფიქროთ ამაზეც, სტუმარს ღირსეული დახვედრა უნდა.

იქნებ ჩვენც მიგვიპატიჟონ საკუთარ პლანეტებზე. რა კარგი იქნება! მერე, ალბათ პირველი კლასიდან ჩვენ უცხოპლანეტელების ენას ვისწავლით – აბა, მათთან საუბარი როგორ უნდა მოვახერხოთ? ალბათ, ჩვენებურ საჭმელსაც ჩავანაცვლებთ იმათებური საკვებით... საინტერესოა, რითი იკვებებიან? ზეთით? ბენზინით? აი, მერე გაძვირდება ბენზინი, თუ გაძვირდება... ტრანსპორტის საფასურიც მოიმატებს... მაგრამ, მთავარია უცხოპლანეტელებმა იგრძნონ თავი, როგორც საკუთარ სახლში. ჩვენ ბევრ რამეს მივეჩვევით, შევიცვლებით... მთავარია, რომ მოდიან, მოდიან!